Komum Alexöndru til Columbia

Veriði sæl!

Ég heiti Alexandra og er nemi í ensku og stjórnmálafræði við Háskóla Íslands. Auk þess sit ég í stjórn ungmennaráðs UN Women, í ritstjórn Röskvu og mun sitja í nýsköpunar- og frumkvöðlanefnd SHÍ næsta skólaárið. Með öðrum orðum: negla. En mál málanna og forsenda þessa verkefnis er að í sumar fæ ég það einstaka tækifæri að læra skapandi skrif & bókmenntir við Columbia háskólann í New York.

Hugmyndin að Komum Alexöndru til Columbia kviknaði í kjölfar þess að ég komst inn í sumarnámið. Það að komast inn í skólann er ekki öll sagan því nú þarf að fjármagna og eins og gefur að skilja kostar svona nám sinn skildinginn. Komum Alexöndru til Columbia mun verða teningaborðspil í sinni einföldustu mynd og á því verða 42 reitir sem er dagafjöldinn sem sumarprógrammið varir. Byrjunarreiturinn er í Reykjavík og markmiðið er að komast að lokareitnum, Columbia. Svo verða hin ýmsu „twist“. Til dæmis kemst maður í efstu línu þegar maður lendir á Empire State byggingunni, Brooklyn brúin hleypir manni lárétt áfram en booze-cruise niður Hudson skilar manni á byrjunarreit.

Ég er að leita til fyrirtækja og stofnana til þess að styrkja mig um einn reit á spilinu. Skólagjöld eru 9.780 bandaríkjadollarar sem gera um það bil 25.000 krónur á dag og er það sú upphæð sem ég vonast til þess að fá fyrir hvern reit. Lógó (eða mynd) tiltekins styrktaraðila myndi svo prýða reitinn. Að lokum yrði spilið selt á spottprísi.

Ég býst ekki við öðru en að Komum Alexöndru til Columbia verði á spilaborðum allra landsmanna í sumar, tekið með í útilegur og utanlandsferðir.

Ég yrði ólýsanlega þakklát ef þú, kæri lesandi, myndir dreifa orðinu, deila síðunni eða íhuga að styrkja.

Kær kveðja,

Alexandra Ýr van Erven

Komum Alexöndru til Columbia

Um verkefnið

Kaupa reit / Keyptir reitir